2478.
राहो येचि ठायी । माझा भाव तुझे पायी ॥१॥
करीन नामाचे चिंतन । जाऊ नेदी कोठे मन ॥धृपद॥
देईन ये रसी । आता बुडी सर्वविशी ॥२॥
तुका म्हणे देवा । साटी करोनिया जीवा ॥३॥

अर्थ :
देवा तुझ्या पायाच्या ठिकाणीच माझा भक्तिभाव राहो. मी तुझ्या नामाचे चिंतन करीन आणि तुझ्या पाया वाचून माझ्या मनाला इतर कोठेही जाऊ देणार नाही. देवा तुझ्या भक्तिरसातच आता मी सर्वतो परी बुडी देईल. तुकाराम महाराज म्हणतात देवा मी तुझ्यासाठी जीवावर उदार होऊन तुझी भक्ती करीन.