1272.
तुझे वर्म हाती । दिले सांगोनिया संती ॥१॥
मुखी नाम धरीन कंठी । अवघा सांडवीन पोटी ॥धृपद॥
नवविधा वेढिन आधी । सापडलासी भावसंधी ॥२॥
तुका म्हणे बळिये गाढे । कळिकाळ पाया पडे ॥३॥

अर्थ :
देवा तुझ्या प्राप्तीचे वर्म संतांनी माझ्या हाती दिली आहे ते वर्म असे आहे की, मी माझ्या मुखाने तुझे नाम घ्यावे आणि ते कंठात धारण करावे आणि मी तुला माझ्या हृदयात साठवून ठेवावे. देवा तू तर माझ्या भक्तिप्रेमात आधीच गुंतलेला आहे. आता मी तुला नवविधाभक्ति ने वेढून टाकील. तुकाराम महाराज म्हणतात आता आम्ही इतके बलवान झालो आहोत की कळीकाळ देखील आमच्या पाया पडतो.