1351.
जेणे वाढे अपकीर्ती । सर्वार्थी ते वर्जावे ॥१॥
सत्य रुचे भलेपण । वचन ते जगासी ॥धृपद॥
होइजेते शूर त्यागे । वाउगे ते सारावे ॥२॥
तुका म्हणे खोटे वर्म । निंद्यकर्म काळिमा ॥३॥

अर्थ :
जेणे अपकीर्ती वाढते त्याचा त्याग करावा. जगाला नेहमी भले पणाने वागणे, खरे वागणे हेच आवडते तर नेहमी खरे वागून, खरे बोलून खरा शूर व्हावे. तुकाराम महाराज म्हणतात निंद्य वागणे, खोटे वागणे हेच आपल्या प्रतिमेला काळे फासण्याचे वर्म आहे.