594.
बहुता रीती काकुलती । आलो चित्ती न धराच ॥१॥
आता काशासाठी देवा । मिथ्या हेवा वाढवू ॥धृपद॥
तुम्हा आम्हा जाली तुटी । आता भेटी चिंतने ॥२॥
तुका म्हणे लाजिरवाणे । अधीर जिणे इच्छेचे ॥३॥

अर्थ :
देवा मी अनेक प्रकारे तुम्हाला काकुळतीला आलो परंतु तुम्ही माझ्याविषयी काही चित्तात विचारत धारण करत नाहीत. मी आता उगाच खोटी हाव कशाला वाढवू ? तुमच्या आमच्या मध्ये ताटातूट झाली आता केवळ तुम्हाला चिंतनाने भेटावे लागेल. तुकाराम महाराज म्हणतात देवा तुमची सगुण दर्शन घडावे अशी इच्छा जर मनात धरावी तर ते जगणे म्हणजे लाजिरवाणे आणि अधीर पणाचे आहे.