446.
जंववरी नाही देखिली पंढरी । वर्णिसी थोर वैकुंठीची ॥१॥
मोक्षसिद्धी तेथे हिंडे दारोदारी । होऊनि कामारी दीनरूप ॥धृपद॥
वृंदावन सडे चौक रंग माळा । अभिनव सोहोळा घरोघरी ॥२॥
नामघोष कथापुराणकीर्तनी । ओविया कांडणी पांडुरंग ॥३॥
सर्व सुख तेथे असे सर्वकाळ । ब्रम्ह ते केवळ नांदतसे ॥४॥
तुका म्हणे जे न साधे सायासे । प्रत्यक्ष ते दिसे विटेवरी ॥५॥

अर्थ :
जोपर्यंत प्रत्यक्ष डोळ्यांनी पंढरपुराचे दर्शन घेतले नाही तोपर्यंतच वैकुंठाची थोरवी तू गाशील. अहो पंढरीमध्ये मोक्ष तसेच सिद्धी हे दिन पणाने दारोदारी हिंडत आहेत काम करणार्‍या दासी प्रमाणे त्यांची अवस्था झालेली आहे, इथे घरोघरी तुळशी वृन्दावने आहेत. रस्ते झाडून, साडे घालून रांगोळ्या काढल्या आहेत. घरोघर अभिनव सोहळा आहे. इथे कथा पुराणे कीर्तन, नाम घोष होत आहे. दळण कांडन करतांना स्रिया पांडुरंगाला आळवून ओव्या म्हणत आहे. इथे सर्वदा सर्व सुख असून मूर्ती मंत ब्रम्ह इथेच आहे. तुकाराम महाराज म्हणतात मोठ्या सायासाने सुद्धा ज्याची प्राप्ती होत नाही ते ब्रम्ह विटेवर प्रत्यक्ष उभे आहे.