2145.
उपचारासी वांज जालो । नका बोलो यावरी ॥१॥
असेल ते असो तैसे । भेटीसरिसे नमन ॥धृपद॥
दुसऱ्यामध्ये कोण मिळे । छंद चाळे बहु मते ॥२॥
एकाएकी आता तुका । लौकिका या बाहेरी ॥३॥

अर्थ :
देवा आता मी तुमची पूजा करण्यास उपचारास असमर्थ झालो आहे त्यामुळे आता याविषयी माझ्याशी काहीही बोलू नका. देवा आता माझ्यापुढे कोणतेही भूतमात्रा येऊ द्या, कोणताही जीव येऊ द्या मी त्यांना तुझ्यासारखा समजेन व त्यांना वंदन करेन. या जगामध्ये अनेक छंद, अनेक चाळे आणि अनेक मते असणारे लोक आहेत त्यांच्यामध्ये आता कोण मिसळेल? तुकाराम महाराज म्हणतात मी आता एकाएकीच या लौकिकका च्या बाहेर पडलो आहे.