1098.
बहुजन्मे केला लाग । तो हा भाग लाधलो ॥१॥
जीव देइन हा बळी । करीन होळी संसारा ॥धृपद॥
गेले मग नये हाता । पुढती चिंता वाटतसे ॥२॥
तुका म्हणे तांतड करू । पाय धरू बळकट ॥३॥

अर्थ :
माझ्या अनेक जन्मीचे पूर्वपुण्य आहे की मला हा मनुष्यदेह प्राप्त झाला. मी या विठ्ठलाच्या चरणी माझा देह अर्पण करेल आणि संसाराची होळी करीन. एकदा की हा मनुष्य देह गेला की पुन्हा मिळत नाही याची चिंता मला वाटत आहे. तुकाराम महाराज म्हणतात आता तातडी करून परमार्थ करावा लागेल आणि हरीचे पाय बळकट धरावे लागेल.