770.
बोलावा विठ्ठल पाहावा विठ्ठल । करावा विठ्ठल जीवभाव ॥१॥
येणे सोसे मन जाले हावभरी । परती माघारी घेत नाही ॥धृपद॥
बंधनापासूनि उकलली गाठी । देता आली मिठी सावकाश ॥२॥
तुका म्हणे देह भारिला विठ्ठले । कामक्रोधे केले घर रिते ॥३॥

अर्थ :
विठ्ठलाचे नाम घ्यावे, विठ्ठलाला डोळे भरून पाहावा, त्याच्यावर जीव अर्पण करावा. या विठ्ठलाच्या चरणांचि इतकी हाव लागली आहे की आता या प्रपंचाकडे मन माघारी धाव घेत नाही. मी संसाररूपी सागरातून मुक्त झालो आहे त्यामुळे मला विठ्ठलाच्या चरणांची सावकाश मिठी घेता आली आहे. तुकाराम महाराज म्हणतात माझ्या हृदयात विठ्ठल परिपूर्ण भरलेला आहे त्यामुळे काम आणि क्रोध यांनी माझे हृदय रुपी घर रिते केले म्हणजे खाली केले.