1526.
असोनि न कीजे अलिप्त अहंकारे । उगीच या भारे कुंथा कुंथी ॥१॥
धावा सोडवणे वेगी लवकरी । मी तो जालो हरी शक्तिहीन ॥धृपद॥
भ्रमल्याने दिसे बांधल्याचे परी । माझे मजवरी वाहोनिया ॥२॥
तुका म्हणे धाव घेतलीसे सोई । आता पुढे येई लवकरी ॥३॥

अर्थ :
आपल्या देहामध्ये आत्मा भिन्न आहे परंतु देहा भिमानामुळे तो वेगळा होत नाही. आणि देहाचे पालन-पोषण करण्यात तो निष्कारण अडकून बसतो त्यामुळे हे हरी तू मला बंधनातून सोडवण्याकरता लवकर धाव घे कारण मी शक्तिहीन झालो आहे. मी देहासक्ती धरली आहे, त्याच्या मोहात गुंतलो त्यामुळे मला बांधल्यासारखे वाटते. तुकाराम महाराज म्हणतात देवा मला बंधनातून तुमच्या वाचून कोणीही सोडवणार नाही असे वाटते त्यामुळे तुम्ही लवकर इकडे या आणि मला बंधनातून सोडवा.