481.
सांगता हे नये सुख । कीर्ती मुख न पुरे ॥१॥
आवडीने सेवन करू । जीवीचे धरू जीवीच ॥धृपद॥
उपमा या देता लाभा । काशा शोभा सारिखी ॥२॥
तुका म्हणे नुचली डोई । ठेविली पायी संतांचे ॥३॥

अर्थ :
संतांच्या कृपेने मला लाभ झाला त्याचे सुख कसे सांगू, ते मला सांगता ही येत नाही त्यांच्या किर्तीचे वर्णन करण्यासाठी माझे मुख देखील कमी पडत आहे. आता त्यांच्या कृपेचा जो लाभ झाला आहे त्याचे आवडीने सेवन करू आणि तेच चित्तामध्ये दृढ धरून ठेवु. हा जो लाभ झाला आहे, त्याला कशाची उपमा देता येणार नाही. तुकाराम महाराज म्हणतात संतांच्या चरणावर मी मस्तक ठेवले आहे. ते आता ते उचलणार नाही.