208.
गर्भाचे धारण । तिने वागविला सिण ॥१॥
व्याली कुर्‍हाडीचा दांडा । वर न घालीच तोंडा ॥धृपद॥
उपजला काळ । कुळा लाविला विटाळ ॥२॥
तुका म्हणे जाय । नरका अभक्ताची माय ॥३॥

अर्थ :
नास्तिकाचा गर्भ धारण करून त्याच्या मातेने निष्कारण कष्ट केले. तिने जणू काही कुर्‍हाडीच्या दांडयाला जन्म दिला आहे, जन्मल्या बरोबर तिने त्याला मारून का टाकले नाही ? तिच्या पोटी जणूकाही काळ जन्माला आला आहे आणि त्याने कुळाला बट्टा लावला आहे. तुकाराम महाराज म्हणतात, अश्या अभक्ताची आई नरकात जाते.