1440.
धरूनिया चाली हावा । येइन गावा धावत ॥१॥
पाठविसी मूळ तरी । लवकरी विठ्ठले ॥धृपद॥
नाचेन त्या प्रेमसुखे । कीर्ती मुखे गाईन ॥२॥
तुका म्हणे संतमेळी । पायधुळी वंदीन ॥३॥

अर्थ :
देवा मी तुझ्या भेटीची इच्छा मनात धरून तुझ्या गावाला धावत येईल आणि हे विठाई तू जर मला बोलावणे पाठवले तर लवकरच मी तुझ्याकडे धावत येईल. मी त्या प्रेम सुखाने नाचेन आणि तुझी कीर्ती गाईन. तुकाराम महाराज म्हणतात संतांच्या मेळ्यामध्ये राहून मी संतांच्या पायाला वंदन करीन.