678.
अष्टही अंगे नवही व्याकरणे ।
सप्तही त्वचा भेदोन गेले गे माय ॥१॥
तेथे वेदा वाट न फुटे वेदा वाट न फुटे ।
येरासी कैचे पुरपुढे गे माये ॥२॥
रखुमादेविवरू मज फावला ।
देखोनी वोरसला पर पाही ॥३॥

अर्थ :
शरीराची आठ अंगे, नवद्वारे, सप्तत्वचा या सर्वांचा भेद करून मी ज्याठिकाणी गेलो. त्याठिकाणी जाण्यास वेदालाही वाट सापडत नाही. तेथे बाकीच्या बोलक्या लोकांची पुटपुट काय सरती होणार? पराचाही पर असणारा रखुमादेवीचे पती जे श्रीविठ्ठल ते मला प्राप्त झाले. त्यांना पाहून मजवर आनंदाचा वर्षाव झाला. असे माऊली सांगतात.