2330.
येणे मुखे तुझे वर्णी गुण नाम । तेचि मज प्रेम देई देवा ॥१॥
डोळे भरूनिया पाहे तुझे मुख । तेचि मज सुख देई देवा ॥धृपद॥
कान भरोनिया ऐके तुझी कीर्ती । ते मज विश्रांती देई देवा ॥२॥
वाहे रंगी टाळी नाचेन उदास । हे देई हातास पाया सुख ॥३॥
तुका म्हणे माझा सकळ देहभाव । आणीक नको ठाव चिंतू यासी ॥४॥

अर्थ :
देवा मी माझ्या मुखाने तुझ्या रुपाचे, तुझ्या गुनाचे वर्णन कायम करेल असेच प्रेम मला तू द्यावे. देवा मी तुझे मुख डोळे भरून पाहिल असेच सुख मला द्यावे. देवा कान भरून तुझी कीर्ती ऐकेन अशीच विश्रांती मला द्यावी. मी तुझ्या नाम चिंतनाच्या आनंद रंगात टाळी वाजविण व देहाविषयी उदास होवून नाचेन हेच सुख माझ्या हाताला व पायाला तू द्यावे. तुकाराम महाराज म्हणतात देवा माझा सर्व देह केवळ तुझेच चिंतन करील व तुझ्यावाचून इतर कोणाचेही चिंतन माझ्या मनात येऊ देऊ नकोस.