2787.
माझे माथा तुझा हात । तुझे पायी माझे चित्त ॥१॥
ऐसी पडियेली गाठी । शरीरसंबंधाची मिठी ॥धृपद॥
येरयेरांपाशी । सांपडोन गेलो ऐसी ॥२॥
तुका म्हणे सेवा । माझी कृपा तुझी देवा ॥३॥

अर्थ :
देवा माझ्या माथ्यावर तुझा हात आहे आणि तुझ्या पायावर माझे चित्त आहे. देवा अशा प्रकारे आपली गाठ पडली असून असा आपला शरीरसंबंध झाला आहे. अशाप्रकारे आपण एकमेकांजवळ एकमेकांना सापडलो गेलो आहोत. तुकाराम महाराज म्हणतात देवा आता माझी सेवा आहे आणि तुमची माझ्यावर कृपा आहे.