2306.
त्रिविधकर्माचे वेगळाले भाव । निवडूनि ठाव दाखविले ॥१॥
आलियाचा झाडा राहिल्याचा ठाव । सुख तो गौरव संता अंगी ॥धृपद॥
हिशेबे आले ते सकळांसी प्रमाण । तेथे नाही आन चालो येत ॥२॥
तुका म्हणे नाही पापपुण्य खती । झाड्याची हुजती हाता आली ॥३॥

अर्थ :
आपल्या शास्त्रात कर्माचे तीन प्रकार सांगितले आहेत सात्विक, राजस, तामस आणि त्यांचे तीन प्रकार पडतात ते म्हणजे इष्ट-अनिष्ट आणि इष्टा, निष्ट ही तीन वेगवेगळे फळे वेगवेगळी करून दाखवलेले आहेत. आलेले भोग मी भोगतो आणि जे संचित कर्मामुळे राहिलेले भोग आहेत ते मी संता वर सोपवून सुखाचा गौरव भोगत राहतो. जे हिशोबाने चालत आले आहे ते सर्वांना मान्य आहे तेथे कोणाचे काही चालत नाही. तुकाराम महाराज म्हणतात आता संतांच्या कृपेने माझ्या सर्व संचित कर्माचा हिशोब पूर्ण झाला असून त्याची पावतीही माझ्या हाती आली आहे त्यामुळे मला पाप पुण्याची आता खंत राहिली नाही.