1996.
मी याचक तू दाता । काय सत्य पाहो आता ॥१॥
म्या तो पसरिला हात । करी आपुले उचित ॥धृपद॥
आह्मी घ्यावे नाम । तुम्हा समाधान काम ॥२॥
तुका म्हणे देवराजा । वाद खंडी तुझा माझा ॥३॥

अर्थ :
देवा मी याचक आहे तू दाता आहेस आता मी तुझ्या कडे दान मागण्यास आलो आहे तु दान देऊन तुझे वाक्य सत्य करतो की नाही आता ते पाहू. देवा मी तुमच्यापुढे तर आता निर्लज्ज होऊन हात पसरला आहे परंतु उचित दान देणे हे तुमचे कर्तव्य आहे. आम्ही तुमचे नाम प्रेमाने घ्यावे त्यामुळे तुम्ही आमचे समाधान करावे हे तुमचे कामच आहे. तुकाराम महाराज म्हणतात हे देवराया आता तुम्ही आणि आम्ही वेगवेगळे आहोत हा आपल्यातला वाद खंडित करा.