2321.
आम्ही जालो एकविध । सुद्या सुदे असावे ॥१॥
यावरी तुमचा मोळा । तो गोपाळा अकळ ॥धृपद॥
घेतले ते उसणे द्यावे । काही भावे विशेषे ॥२॥
तुका म्हणे क्रियानष्ट । तरी कष्ट घेतसा ॥३॥

अर्थ :
देवा आम्ही तुझ्याशी एकरूप झालो आहोत त्यामुळे तुम्ही ही आमच्याशी एकरूपता धरावी कारण व्यवहार सांगतो जो जसे वागेल तसे त्याच्याशी वागावे. परंतु हे गोपाळा तुमची रीतच आम्हाला कळत नाही. विशेष प्रसंगी ज्याच्याकडून जी काही वस्तू उसनी घेतली असेल ती त्याला परत द्यावी. तुकाराम महाराज म्हणतात देवा तुम्ही क्रियानष्ट आहात केवळ आमच्याकडूनच सेवा रुपी कष्ट करून घेत आहात.