931.
निर्वैर होणे साधनाचे मूळ । येर ते विल्हाळ सांडीमांडी ॥१॥
नाही चालो येत सोंगसंपादणी । निवडे अवसानी शुद्धाशुद्ध ॥धृपद॥
त्यागा नांव तरी निर्वीषयवासना । कार्‍या कारणा पुरता विधि ॥२॥
तुका म्हणे राहे चिंतनी आवडी । येणे नावे जोडी सत्यत्वेसी ॥३॥
अर्थ :
सर्वाशी निर्वैर होणे हे सर्व साधनांचे मूळ आहे बाकी इतर खटपट त्यामानाने कमी प्रतीचे आहेत. परमार्थात कुठलेही ढोंग चालत नाही शेवटी शुध्द व अशुध्ह काय याचा निवडा होत असतो. सर्व प्रकारच्या वासना नाहीश्या होणे याला त्याग म्हणतात विधी पूर्वक कार्य करणा पुरते विषयाचे सेवन याला त्याग म्हणतात. तुकाराम महाराज म्हणतात ज्याला एका हरी चिंतनाची आवड निर्माण होते तोच खरा होय आणि त्याचेच नाते सत्याशी जोडले जाते हाच त्याचा लाभ होय.