1420.
देह तव असे भोगाचे अधीन । याचे सुख सीण क्षीणभंगर ॥१॥
अविनाश जोडी देवापायी भाव । कल्याणाचा ठाव सकळही ॥धृपद॥
क्षणभंगुर हा तेथील पसारा । आलिया हाकारा अवघे नासे ॥२॥
तुका म्हणे येथे सकळ विश्रांति । आठवावा चित्ती नारायण ॥३॥

अर्थ :
हा देह प्रारब्ध भोगाच्या आधीन आहे त्यामुळे होणारे सुख दुःख क्षणभंगुर आहे. अविनाशी पांडुरंगाच्या चरणावर निष्ठायुक्त भक्ती केली तर अविनाशी सुख प्राप्त होते कारण हरिचरण सर्व कल्याणाचे ठिकाण आहे. या विश्वातील सर्व म्हणजे जेवढा काही पसारा आहे तो क्षणिक आहे कारण विश्वातील जे काही आकाराला आलेले आहे ते सर्व नष्ट होणारे आहे. तुकाराम महाराज म्हणतात आपल्या चित्तामध्ये नेहमी नारायणाचे चिंतन करावे कारण त्याच्या चिंतना मध्येच सर्वकाही समाधान आहे.