1531.
टाळ दिंडी हाती उभा महाद्वारो | नामा कीर्तन करी पंढरिये ॥१॥
आवडीचेनि सुखे वोसंडतु प्रेमे गातो मनोधमे हरिचे गुण ॥२॥
सांडोनि अभिमान नाचे धरोनि कान | अंतरी ध्यान विठोबाचे ॥३॥
श्रीहरिची उत्तम जन्मकर्मनामे | घेतली त्या प्रेमे सुखरूपे ॥४॥
संतांची विश्रांति ज्ञानियांचे गुज | जे का मुक्तिबीज मोक्षदानी ॥५॥
कृष्ण विष्णु हरी मुकुंद मुरारी | अच्युता नरहरी नारायणा ॥६॥
गोवर्धनधरे गोपीमनोहरे | भक्तकरुणाकरे पांडुरंगा ॥७॥
सकळा मंगळनिधी पातकभंजना हरिजगज्जीवना परमानंदा ॥८॥
तूंचि एक सकळ आदिमध्यअंती | नित्य सुखसंपत्ति सज्जनांची ॥९॥
तूंचि माशा श्रोता तूंचि माझा वक्ता | तूंचि घेता देता प्रेमसुख ॥१०॥
विष्णुदास नामा विनवी पुरुषोत्तमा | सोडवी भवभ्रमा पासूनिया ॥११॥