61.
मैत्र केला महाबळी । कामा न ये अंतकाळी ॥१॥
आधी घे रे रामनाम । सामा भरी हा उत्तम ॥धृपद॥
नाही तरी यम । दात खातो करकरा ॥२॥
धन मेळविले कोडी । काळ घेतल्या न सोडी ॥३॥
कामा न ये हा परिवार । सैन्य लोक बहु फार ॥४॥
तववरी तुमचे बळ । जव आला नाही काळ ॥५॥
तुका म्हणे बापा । चुकवी चौर्‍याशीच्या खेपा ॥६॥

अर्थ :
महाबलवान मित्र जोडलेस तरि ते अंत:काळी उपयोगी पडत नाही. तेव्हा मृत्यु येण्याआधी रामनाम संपत्ति तू जमवुन ठेव. रामनामाचि संपत्ति नसेल तर यम (काळ) कराकरा दात खाईल. धन-संपत्ति कितीही मिळवली तरी काळाचा आघात हा होणारच आहे. तुझ्याजवळ सैन्य, परिवार, नातेवाईक कितीही असले तरी शेवटी कोणीच कामाला येणार नाहीत. जो पर्यन्त काळाचा आघात होणार नाही तो पर्यंत तुझी शक्ती कामे करील. तुकाराम महाराज म्हणतात, अहोबापानो चौर्‍यांशीचा फेरा चुकविण्यासाठी, तुला राम नामाचे साधन जमविले पाहिजे.