662.
गाढवाचे अंगी चंदनाची उटी । राखेसवे भेटी केली तेणे ॥१॥
सहज गुण जयाचीये देही । पालट तो काही नव्हे तया ॥धृपद॥
माकडाचे गळा मोलाचा मणि । घातला चावुनी थुंकोनि टाकी ॥२॥
तुका म्हणे खळा नावडे हित । अविद्या वाढवीत आपुले मते ॥३॥

अर्थ :
गाढवाला जरी चंदनाची उटी लावली तरी तो उकिरड्यात जाऊन राख अंगाला लावून घेणार. त्या प्रमाणे ज्याचा स्वभावी गुण जसा असेल तसा तो सहज बदलू शकत नाही. माकडाच्या गळ्याला जर मौल्यवान मनी बांधला तरी तो चावून थुंकोन टाकणारच. तुकाराम महाराज म्हणतात त्या प्रमाणे वाईट माणसाला आपले हित कळत नाही, तो आपल्या मताने अज्ञान वाढवीत असतो.