188.
लक्ष लाऊनि अंतरी । कृष्णा पाहती नर नारी ।
लावण्यसागरू हरी । परमानंदु ॥१॥
छंदे छंदे वेणू वाजे । त्रिभुवनी घनु गाजे ।
उतावेळ मन माझे । भेटावया ॥धृ॥
ब्रह्मविद्येचा पुतळा । गाई राखितो गोंवळा ।
श्रुति नेणवे ते लीळा । वेदा सनकादिका ॥३॥
भूतग्रामींचा परेशु । तापत्रयाचा करी नाशु ।
आड धरुनी गोपवेषु । वत्से राखे ॥४॥
रासक्रीडा वृंदावनी खेळे । इंदुवदन मेळे ।
उद्धरी यदुकुळे । कुळदीपके ॥५॥
निवृत्तीदासाचा दातारू । बापखुमादेविवरू ।
भक्ता देतो अभयकरू । क्षणांक्षणांमाजी ॥६॥