1522.
फलकट तो संसार । येथे सार भगवंत ॥१॥
ऐसे जागवितो मना । सरसे जनासहित ॥धृपद॥
अवघे निरसूनि काम । घ्यावे नाम विठोबाचे ॥२॥
तुका म्हणे देवाविण । केला सीण तो मिथ्या ॥३॥

अर्थ :
फोलपटा प्रमाणे असणारा संसार मिथ्या आहे व सर्व संसाराचेही सार असणारा भगवंत सत्य आहे. हाच विचार मी माझ्या मनामध्ये व सर्व जणांमध्ये जागवित आहे. संसाराचे सर्व कामं बाजूला सारून एक विठोबाचे नाम घ्यावे. तुकाराम महाराज म्हणतात देवा वाचुन कोणताही व्यवहार व्यर्थ आहे आणि मीथ्या आहे.