152.
श्रीकृष्णाचे एका गोपीवरील प्रेम व श्रुती रुपी गोपींचा श्रीकृष्ण शोध

ऐकावे चरित्र परीक्षितिराया । बरोबरी जाया एक असे ॥१॥
तोडोनिया पुष्पे करी अलंकार । घालीत श्रीधर तिजवरी ॥२॥
नये क्षणभरी योगियांचे ध्यानी । घालितसे वेणी आवडीने ॥३॥
वंदियेली शिवे चरणींची गंगा । करीतसे भांगा नीट तीच्या ॥४॥
गोपिकांच्या वेषे प्रगटल्या श्रुती । गुह्य हे तुजप्रती सांगितले ॥५॥
घेवोनिया तिसी गेला कुंजवना । वज्रांकुश चिन्हा उमटती ॥६॥
गोपिकांचा मेळा येतसे तांतदी । युगाऐसी घडी झाली तया ॥७॥
नलगेची शोध शीणती सकळा । न जाती गोकुळा नामा ह्मणे ॥८॥