1692.
तरी आम्ही तुझी धरियेली कास । नाही कोणी दास वाया गेला ॥१॥
आगा पंढरीच्या उभा विटेवरी । येई लवकरी धावा नेटे ॥धृपद॥
पालवितो तुज उभरोनि बाहे । कृपावंता पाहे मजकडे ॥२॥
तुका म्हणे तुज बहु कान डोळे । का हे माझे वेळे ऐसी परी ॥३॥

अर्थ :
देवा तु आज पर्यंत केलेले कोणतेही कार्य व्यर्थ गेले नाही त्यामुळे आम्ही तुझी कास धरली आहे. हे पंढरीषा विटेवर उभे असलेल्या पांडुरंगा तू लवकर धाव घे व आमच्याकडे धावत लवकर ये देवा. हे देवा मी माझे दोन्ही हात वर करून तुला माझ्याकडे बोलावीत आहे तरी हे कृपावंता तू माझ्या कडे पहावेत. तुकाराम महाराज म्हणतात देवा मी वेदांमध्ये असे ऐकले आहे की तुला खूप कान आहेत खूप डोळे आहेत मग माझ्या वेळेसच तू असा आंधळा बहिरा का झाला आहेस.