543.
द्रव्याचिया मागे किळकाळाचा लाग । म्हणोनिया संग खोटा त्याचा ॥१॥
निरयाचे मूळ घालुनिया मागे । मांडिली प्रसंगे कथा पुढे ॥धृपद॥
आजिच्या प्रसंगे हाचि लाभ घ्यावा । पुढील भार देवावरी घाला ॥२॥
प्रारब्ध काही न पालटे सोसे । तृष्णेचे हे पिसे वायाविण ॥३॥
तुका म्हणे घेई राहे ऐसे धन । सादर श्रवण करोनिया ॥४॥

अर्थ :
धनाच्या मागे काळ लागलेला असतो. धनाचि संगत हि खरोखर खोटी आहे. धन कितीही मिळविले तरी समाधान नाही. धनाचा अति लोभ हे नरकाचे मुळ आहे. त्याच त्याग करून मी आता अक्षयरूप हरी कथा सांगत आहे. आज या भगवंताच्या लीलाविलासाच्या कथेचा लाभ घ्या आणि प्रपंचाचा भार भगवंताच्या चरणावर अर्पण करा. तो तुमचा योगक्षेम सांभाळील. आपल्या प्रारब्धात असेल ते काही बदलत नाही. त्यामुळे धनाची एकसारखी लालसा व्यर्थ आहे. तुकाराम महाराज म्हणतात भगवंताचे नाम श्रवण करून तेच धन जतन करा व तेच धन आपल्या जवळ राहणार आहे.