385.
वंदीन मी भूते । आता अवघीचि समस्ते ॥१॥
तुमची करीन भावना । पदोपदी नारायणा ॥धृपद॥
गाळुनिया भेद । प्रमाण तो ऐसा वेद ॥२॥
तुका म्हणे मग । नव्हे दुजियाचा संग ॥३॥

अर्थ :
यापुढे आता या भुतलावर जी काही भूत मात्र आहेत ती सर्व देवाचीच रुप समजून त्यांना मी वंदन करेन. अहो नारायण सर्व प्राणीमात्र म्हणजे तुम्हीच आहात अशी भावना मी धरीन. लहानमोठा भेद बाजूला सारून पदोपदी मी सर्वत्र तुम्हाला पाहीन. तुकाराम महाराज म्हणतात याविषयी वेद मला प्रमाण आहेत. असे झाल्यावर कोणताही दुजेपणा मनात उत्पन्नच होणार नाही.