2228.
करूनी चिंतन खेळो भोवताले । चित्त येथे आले पायापाशी ॥१॥
येथे नाही खोटा चालत परिहार । जाणसी अंतर पांडुरंगा ॥धृपद॥
सुखदुःखे तुज देऊनी सकळ । नाही ऐसा काळ केला आम्ही ॥२॥
तुका म्हणे जाला देहाचा विसर । नाही आता पर आप दोन्ही ॥३॥

अर्थ :
देवा तुझे सारखे चिंतन करून करून माझे चित्त आता तुझ्या पाया भवताली खेळत आहे. अरे पांडुरंगा तुला खोटा परिहार देऊन चालणार नाही कारण तु सर्वांचे अंतकरण जाणतो आहेस. देवा आम्ही आमचे सर्व सुखदुःख तुला देऊन टाकले आहे आणि काळाचे खंडण केले आहे. तुकाराम महाराज म्हणतात आता मला देहाचा विसर पडला आहे त्यामुळे माझ्यासाठी कोणी आपले व परके नाही.