1401.
भाग्यवंता हेची जोडी । परवडी संतांची ॥१॥
धन घरी पांडुरंग । अभंग जे सरेना ॥धृपद॥
जनाविरहित हा लाभ । टांचे नभ साठवणे ॥२॥
तुका म्हणे विष्णुदासा । नाही आशा दुसरी ॥३॥

अर्थ :
जे खरच भाग्यवंत आहेत त्यांना संत संगती हाच मोठा लाभ आहे असे वाटते. त्या भक्तांना असे वाटते की, अभंग असणारे म्हणजे कधीही न संपणारे पांडुरंग रूपी धन आपल्या घरी असावे. हा लाभ इतर लोकापेक्षा ही वेगळा आहे हा लाभ साठविण्यासाठी आकाश देखील कमी पडते. तुकाराम महाराज म्हणतात पांडुरंग आणि संत यावाचून दुसरी कोणतीही अपेक्षा विष्णुदासांना नसते.