528.
एक मन तुझ्या अवघ्या भांडवला । वाटिता ते तुला येईल कैसे ॥१॥
म्हणउनि दृढ धरी पांडुरंग । देहा लावी संग प्रारब्धाचा ॥धृपद॥
आणिका संकल्पा नको गोऊ मन । तरीच कारण साध्य होय ॥२॥
तुका म्हणे ऐसे जाणावे उचित । तरी सहज स्थित येईल कळो ॥३॥

अर्थ :
तुझे मन विविध व्यवहाराकडे कसे बरे वाटून घेता येईल ? तू आपला देह प्रारब्धाच्या स्वाधीन कर. तू आपल्या मनात पाडूरंगाचे दृढ चिंतन कर. याशिवाय इतर कोणत्याही संकल्पामध्ये तू आपल्या मनाला गुंतवून ठेऊ नकोस. असे केलेस तर जीवनाचे ध्येय जे परमार्थ, ते तुला साध्य होईल. तुकाराम महाराज म्हणतात असे उचित जे आहे, ते तू जाणावे. त्यामुळे आत्मस्थिती कशी असते, हे आपोआप समजून येते.