1253.
अगाध महिमा यात्रा कार्तिकिंये | आला पंढरीये नामदेव ॥१॥
भक्ता शिरोमणी श्रीपंढरिनाथा | कृपाळुंवा माता बाळकासी ॥२॥
धन्य नामदेव धन्य नामदेव | हृदयी पंढरीराव न विसंबे ॥३॥
प्रेमळ भक्त मिळोन अपार | करिताती गजर हरिनामाचा ॥४॥
नटनाट्य कीर्तन झळकती गरुडटके | करिती ब्रह्मादिक पुष्पवृष्टी ॥५॥
नामघोष श्रवण सकळा समाधान | चुकले जन्म-मरण कल्पकोटी ॥६॥
नामा म्हणे जीव निवाला बा तेथे | पाहाता विठोबाते श्रम गेला ॥७॥