456.
त्याग तव मज न वजता केला । काहीच विठ्ठला मनातूनि ॥१॥
भागलिया आला उबग सहज । न धरिता काज झाले मनी ॥धृपद॥
देह जड झाले ॠणाच्या आभारे । केले संवसारे कासावीस ॥२॥
तुका म्हणे गेला आळसकिळस । अकर्तव्य दोष निवारले ॥३॥

अर्थ :
हे विठ्ठला मला कोणत्याही विषयांचा त्याग केला नाही तरीदेखील त्याचा त्याग घडला आहे. कारण संसाराच्या त्रासाने माझ्याकडून सहजच त्याचा त्याग झाला आहे. ऋणाच्या भाराने माझा देह जड झाला संसार आणि मला फार कासावीस केले. तुकाराम महाराज म्हणतात संसारातील आपत्तीने मी तळमळलो त्यामुळे आळस आला, संसाराचा तिटकारा आला. परमार्थाचा तिटकारा आलाच नाही. पर्मार्थाचाच उत्साह वाढला. म्हणून संसारिक पणामुळे जो त्रास होतो, त्याचे निवारण आपोआप झाले आहे.