2326.
आता नये बोलो अव्हेराची मात । बाळावरी चित्त असो द्यावे ॥१॥
तुज का सांगणे लागे हा प्रकार । परि हे उत्तर आवडीचे ॥धृपद॥
न वंची वो काही एकही प्रकार । आपणा अंतर नका मज ॥२॥
तुका म्हणे मोहो राखावा सतंत । नये पाहो अंत पांडुरंगा ॥३॥

अर्थ :
देवा आता माझा अव्हेर करण्याच्या गोष्टी तू करू नकोस तुझ्या बाळावर तुझे चित्त असू द्यावे. देवा तुम्हाला या सर्व गोष्टी सांगण्याची गरज नाही परंतु मी केवळ तुमच्याशी आवडीने बोलत आहे. देवा आता मला कोणत्याही गोष्टीविषयी वंचित ठेवू नका आणि तुमच्या स्वतःपासून मला अंतर देऊ नका. तुकाराम महाराज म्हणतात अहो पांडुरंगा तुम्ही माझा अंत पाहू नका सतत माझ्याविषयी प्रेम राखावे.