1274.
अवघे जेणे पाप नासे । ते हे असे पंढरीसी ॥१॥
गात जागा गात जागा । प्रेम मागा विठ्ठला ॥धृपद॥
अवघी सुखाची च राशी । पुंडलिकाशी वोळली हे ॥२॥
तुका म्हणे जवळी आले । उभे ठाले समचरणी ॥३॥

अर्थ :
सर्व पाप ज्याच्या दर्शनाने नष्ट होतात असे ते ब्रम्‍ह पंढरीत आहे. त्यामुळे गात – गात पंढरीला जा आणि त्या विठ्ठलाला प्रेम मागा. जी सर्व सुखाची राशी आहे अशी सुखाची राशी पुंडलिका साठी विटेवर उभी राहिली आहे. तुकाराम महाराज म्हणतात हे ब्रम्ह आपल्या जवळ आले आहे आणि विटेवर त्याचे समचरण ठेवून उभे राहिले आहे.