892.
आश्चर्य या वाटे नसत्या छंदाचे । कैचे दिले साचे करोनिया ॥१॥
दुजियासी तव अकळ हा भाव । कराया तो जीव साक्षी येथ ॥धृपद॥
एकी अनेकत्व अनेकी एकत्व । प्रकृतिस्वभावत्व प्रमाणेचि ॥२॥
तुका म्हणे करू उगवू जाणसी । कुशळ येविशी तुम्ही देवा ॥३॥

अर्थ :
या देवाचे खरोखर कौतुक वाटते कारण त्याने नसत्या छंदात या जीवाला टाकले आहे जीव हा मिथ्या असून सर्वाना तो खरा वाटतो या भ्रमात देवाने टाकले आहे. हा भ्रम कसा होतो ते दुसऱ्याला कळत नाही हा मोह न धरता जीवाने साक्षित्वाने राहावे. या हरीच्या ठिकाणी नामात्मक रूपाचा भास होतो व तो आपल्याला एकत्वाने भासतो याचे कारण म्हणजे प्रकृती स्वभाव आहे. तुकाराम महाराज म्हणतात अश्या प्रकारचा गुंता करण्या विषयी आणि सोडविण्या विषयी तुम्ही मोठे कुशल आहात देवा.