1446.
रणी निघता शूर न पाहे माघारे । ऐशा मज धीरे राख आता ॥१॥
संसारा हाती अंतरलो दुरी । आता कृपा करी नारायणा ॥धृपद॥
वागवितो तुझिया नामाचे हत्यार । हाचि बडिवार मिरवितो ॥२॥
तुका म्हणे मज फिरता माघारे । तेथे उणे पुरे तुम्ही जाणा ॥३॥

अर्थ :
युद्धाला निघालेला शूर शिपाई जसा मागे वळून पाहत नाही अगदी तसेच धैर्य माझ्यामध्ये तुम्ही राखावे. हे नारायणा मी संसाराच्या हातून बाजूला झालो आहे आता माझ्यावर कृपा करावी. तुझ्या नामाचे हत्यार मी वागवीत आहे आणि त्याचीच बढाई मी सर्वत्र करत आहे. तुकाराम महाराज म्हणतात हे देवा मी जर प्रपंचाकडे मागे फिरलो तर त्यात कमीपणा आहे की मोठेपण आहे हे तुम्ही जाणा.