2324.
माझी आता सत्ता आहे । तुम्हा पाया हे वरती ॥१॥
एकाविण नेणे दुजा । पंढरिराजा सर्वांगे ॥धृपद॥
पुरवावी केली आळी । जे जे काळी मागेन ते ॥२॥
तुका म्हणे सुटसी कैसा । धरूनि दिशा राहिलो ॥३॥

अर्थ :
देवा आता माझी सत्ता तुमच्या पायावर आहे. हे पंढरीराया मी आता सर्वांगाने म्हणजे काया-वाचा-मनाने तुमच्या एकट्या वाचून दुसरे काहीही जाणत नाही. देवा ज्यावेळी मी जी काही तुम्हाला इच्छा मागेन ती इच्छा तुम्ही पूर्ण केली पाहिजे. तुकाराम महाराज म्हणतात देवा तू आता माझ्या हातून सुटशीलच कसा कारण मी सर्व दिशा धरून राहिलो आहे.