361.
नये जरी काही । तरी भलतेचि वाही ॥१॥
म्हणविल्या दास । कोण न धरी वेठीस ॥धृपद॥
समर्थाच्या नावे । भलतैसे विकावे ॥२॥
तुका म्हणे सत्ता । वरी असे त्या बहुता ॥३॥

अर्थ :
तुला कोणत्याही प्रकारचे ज्ञान नसेल तरी चालेल, मी हरीचा दास आहे असे जरी तू म्हटले तरी तुला जन्म मृत्यूचा कोणीही वेठीस धरणार नाही. कारण श्री हरीचे नाम हे समर्थ आहे व त्याचे नांव घेतले तर मग कोणताही माल म्हणजे कोणताही मनुष्य जन्म मृत्यूच्या तावडीतून सुटतो. तुकाराम महाराज म्हणतात त्या समर्थाची सत्ता सर्वावर असते.