881.
क्षणक्षणा सांभाळितो । साक्षी होतो आपुला ॥१॥
न घडावी पायी तुटी । मने मिठी घातली ॥धृपद॥
विचारतो वचना आधी । धरूनि शुद्धी ठेविली ॥२॥
तुका म्हणे मागे भ्यालो । तरी जालो जागृत ॥३॥

अर्थ :
हरी चरणी माझे मन रममाण झाले आहे ते कोठेही जाऊ नये म्हणून मी क्षण क्षणाला त्याचा सांभाळ करतोय आणि त्याचा मीच माझा साक्षीदार आहे. म्हणून मी तुमच्या चरणाला जी मिठी घातली आहे ती कधी तुटू नये म्हणू सावधगिरी बाळगतो आहे. या पूर्वीही कित्येक वेळा मी असा अनुभव घेतला आहे कि हरी आज्ञेचे विस्मरण झाले की, तुकाराम महाराज म्हणतात हरी चरणाचा वियोग होतो आणि मी हे पाहूनच सावध झालो आहे.