2108.
सावित्रीची विटंबना । रांडपण करीतसे ॥१॥
काय जाळावे ते नांव । अवघे वाव असे ते ॥धृपद॥
कुबेर नांव मोळी वाहे । कैसी पाहे फजिती ॥२॥
तुका म्हणे ठुणगुण देखे । उगी मुखे का फुंदता ॥३॥

अर्थ :
एका स्त्रीचे नांव सावित्री होते परंतु काही दिवसांनी ती विधवा झाली त्यामुळे ति विधवा झाल्यामुळे सावित्री या नावाला काहीच अर्थ राहिला नाही. त्या नावाला काय जाळावे नांव कोणतेही असो परंतु त्याप्रमाणे जर वस्तुस्थिती नसेल तर त्याचा काहीही उपयोग होत नाही. एखाद्याचे नांव कुबेर आहे आणि तो काम काय करतो तर मोळी वाहतो मग पहा त्या नावाची कशी फजिती झाली आहे कारण कुबेरा जवळ धनाची काहीच कमतरता नसते. तुकाराम महाराज म्हणतात नांव काहीही असो परंतु मनुष्याच्या अंतरंगातील सद्गुण पाहिले पाहिजे नाहीतर काही मनुष्य उगाचच मी हुशार आहे मी तत्त्वज्ञानी आहे असे फुंदत बसतात.