1227.
धनवंतालागी । सर्वमान्यता हे जगी ॥१॥
माता पिता बंधु जन । सर्व मानिती वचन ॥धृपद॥
जव चाले मोठा धंदा । तव बहिण म्हणे दादा ॥२॥
सदा शृंगारभूषणे । कांता लवे बहुमाने ॥३॥
तुका म्हणे धन । भाग्य अशाश्वत जाण ॥४॥

अर्थ :
धनवंत लोकांना सर्व जगात मान्यता आहे. माता पिता बंधू सर्व लोक त्याचेच ऐकतात. जोपर्यंत धंदा मोठ्या प्रमाणात चालतो तोपर्यंत बहीण भावाला दादा दादा म्हणते. बायकोला जर शृंगार भूषणे दिले तर ती नवऱ्याच्या पुढे आदराने लवते त्याला बहुमान देते. तुकाराम महाराज म्हणतात धन आणि धनामुळे प्राप्त झालेले भाग्य हे दोन्ही न टिकणारे आहे.