904.
म्हणती सकळ द्विज जावे प्रतिष्ठाना | तेथुनी पत्र आणा ते वंद्य करू ॥१॥
नाही जाती कुळ वर्ण अधिकार | क्षेत्री वैश्य शूद्र द्विज नोहे ॥२॥
नव्हो देवगण यक्ष ना किन्नर | ऋषि निशाचर तेही नव्हो ॥३॥
ते आम्ही अविनाश अव्यक्त जुनाट | निजबोधे इष्ट स्वरूप माझे ॥४॥
नव्हो आप तेज वायू व्योम मही | महत्तत्व तेही विराट नव्हो ॥५॥
नव्हे मी सगुण नव्हे मी निर्गुण | अनुभूती भजन होउनी नव्हे ॥६॥
निवृत्ती म्हणतसे ऐके ज्ञानेश्वरा| माझी परंपरा ऐसी आहे ॥७॥