1954.
वैष्णवांची कीर्ती गाइली पुराणी । साही अठरांजणी चहू वेदी ॥१॥
ऐसे कोणी दावा ग्रंथांचे वाचक । कर्मठ धार्मिक पुण्यशील ॥धृपद॥
आदिनाथ शंकर नारद मुनेश्वर । शुका ऐसा थोर आणिक नाही ॥२॥
तुका म्हणे मुगुटमणी हरीभक्ती । आणीक विश्रांति आरतिया ॥३॥

अर्थ :
वैष्णवांची कीर्ती पुराणांनी, सहा शास्त्रे, अठरा पुराणे आणि चार वेदांनी गायली आहे. असा कोण वैष्णवा पेक्षा श्रेष्ठ आहे तो मला दाखवा हे ग्रंथाचे वाचकहो कर्मठ आणि धार्मिक पुण्यशील हो तुम्ही मला सांगा. आदिनाथ शंकर नारद मुनिश्वर आणि शुकमुनी हे देखील वैष्णव आहेत त्यांच्या पेक्षा कोणीही मोठे नाही. तुकाराम महाराज म्हणतात हरिभक्ती ही सर्व साधनांचे मुकुटमणी आहे इतर सर्व साधने हे गौण आहेत.