47.
नव्हे आराणूक संवसारा हाती । सर्वकाळ चित्ती हाचि धंदा ॥१॥
देवधर्म सांदी पडिले सकळ । विषयी गोंधळ गाजतसे ॥धृपद॥
रात्रि दीस न पुरे कुटुंबाचे समाधान । दुर्लभ दर्शन ईश्वराचे ॥२॥
तुका म्हणे आत्महत्या रे घातकी । थोर होते चुकी नारायणी ॥३॥

अर्थ :
सदा-सर्वकाळ संसाराची चिंता करतात त्यांना क्षणभराचिसुद्धा विश्रांति मिळत नाही. देव धर्म त्यांनी कोपर्‍यात टाकले आहेत, संसारातील कामपुर्तिसाठी जेव्हा हवे तेव्हा त्यांचा उपयोग करतात. रात्रंदिवस कष्ट केले तरी कुटुंबाचे समाधान होत नाही, त्यामुळे त्यांचे देवाकडे लक्ष जात नाही. तुकाराम महाराज म्हणतात, नारायणा विषयी त्यांची मोठी चूक होते असे प्रापंचिक लोक स्वत:च स्वत:ची हत्या करतात.