1669.
काय ऐसा जन्म जावा वायाविण । काही तरी ॠण असो माथा ॥१॥
कोणे तरी काळे होईल आठव । नाही जरी भाव भार खरा ॥धृपद॥
शता एकातरी जन्माच्या शेवटी । कृपाळुवा पोटी येईल दया ॥२॥
तुका म्हणे तरी नाही फांको देत । सर्वाचे उचित सापडले ॥३॥

अर्थ :
आपल्याला चांगला मनुष्य देह मिळाला आहे तो असाच वाया जाऊ देणे चांगले आहे काय. आपल्याजवळ देवाच्या सेवेचे काहीतरी ऋण असू द्यावे. असे केल्याने केव्हातरी हरी आपल्याला भेट देईल कारण आपल्या माथ्यावर त्याच्या सेवेचा भार आहे त्या देवाची नितांत सेवा केल्याने शंभर जन्माच्या शेवटी का होईना पण कृपाळू देवाला आपल्या विषयी दया येईलच. तुकाराम महाराज म्हणतात सर्वात उत्कृष्ट साधन म्हणजे देवाची सेवा आहे त्यामुळे देवाच्या सेवेवाचून मी माझे मन इतर कोठेही फेकून देत नाही.