1626.
तुज जाणे तान्हे नाही पांडुरंगा । का जी मज सांगा उपेक्षिले ॥१॥
तुज ठावे होते पातकी मी खरा । आधीच का थार दिधली पायी ॥धृपद॥
अंक तो पाडिला हरीचा मी दास । भेद पंगतीस करू नये ॥२॥
तुका म्हणे आम्ही जिंतिले ते खरे । आता उणे पुरे तुम्हा लागी ॥३॥

अर्थ :
हे पांडुरंगा मी तुमचे तान्हे बाळ आहे मी तुमच्या मूळ स्वरूपाला जाणू शकत नाही तरीही तुम्ही माझी उपेक्षा का केली हे तुम्ही मला सांगा ? तुला माहित आहे की मी पतकी आहे तर मग तू आधी मला का थारा दिला, का तुझ्या पाया जवळ मला आश्रय दिला ? देवा मी हरी भक्तांमध्ये जरी पहिल्या क्रमांकावर नसेल परंतु मी हरी भक्तांचे पंक्तीत तर बसलेलो आहे, त्यामुळे माझ्या मध्ये तुम्ही पंक्ती भेद करू नका. तुकाराम महाराज म्हणतात देवा आम्ही तुला खरोखर जिंकले आहे आणि आमच्या मध्ये काही उणेपुरे जर असेल तर त्याची जबाबदारी तुमची असेल.