405.
नवा नवसांची । झालो तुह्मासी वाणीची ॥१॥
कोण तुझे नाम घेते । देवा पिंडदान देते ॥धृपद॥
कोण होते मागे पुढे । दुजे बोलाया रोकडे ॥२॥
तुका म्हणे पांडुरंगा । कोणा घेतोसि वोसंगा ॥३॥

अर्थ :
अहो देवा आम्ही तुमची नव्या नवसाची लेकरे आहोत. देवा आमच्या वाचून तुझे नांव कोण घेणार आहे जीवरुपी पिंड आम्ही दान तुला देत आहोत ते आमच्या वाचून तुला कोण देणार आहे, आमच्या खेरीज मागे पुढे तुम्हाला परखड शब्दात बोलणारे, रोकठोक प्रश्न विचारणारे दुसरे कोण आहे. आम्ही पांडुरंग, आम्ही तुझी मुले नसतो, तर तुम्ही पदरात कोणाला घेतले असते.