751.
वेदपुरुष तरि नेती का वचन । निवडूनि भिन्न दाखविले ॥१॥
तुझी वर्मे तूचि दावूनि अनंता । होतोसी नेणता कोण्या गुणे ॥धृपद॥
यज्ञाचा भोक्ता तरि का नव्हे सांग । उणे पडता अंग क्षोभ घडे ॥२॥
वससील तू या भूताचे अंतरी । तरि का भेद हरी दावियेला ॥३॥
तपतिर्थाटणे तुझी मूर्तीदान । तरि का अभिमान आड येतो ॥४॥
आता क्षमा कीजे विनवितो तुका । देऊनिया हाका उभा द्वारी ॥५॥

अर्थ :
हे देवा तुम्ही तर साक्षात वेद रूप आहात तरी हि तुम्हाला “नेती नेती” या शब्दाने जगापेक्षा वेगळे का बरे केले ? हे अनंता तुझे जे काही वर्म आहेत ते तूच दाखविले आहे, मग हे वर्म दाखवून तू कोणत्या गुणामुळे नेणता होतोस ? तू तर यज्ञाचा भोक्ता आहेस, मग तो यज्ञ का पूर्ण होत नाहि ? त्यात काही उणे असल्यावर क्षोभ का होतो ? हे देवा तू सर्व भूतमात्रांच्या ठिकाणी वसतोस मग हा भेद का निर्माण केलास ? तप करणे, तीर्थाटन करणे, दान करणे हे जर सर्व तुझीच मूर्ती आहेत मग हे सर्व करणारे लोकांच्या मानत अभिमान का निर्माण होतो ? तुकाराम महाराज म्हणतात आता मला क्षमा करावी देवा कारण हि सर्व गाऱ्हाणी मी तुम्हाला सांगण्यासाठी तुमच्या दारात उभा राहून मी तुम्हाला विनंती करत आहे व हाक मारत आहे.